Ël nùmer 32, anno IX, dë «’L Birichin» a në da cost resocont: «Ant la ricorensa dla festa mondial dij doi d’Agost «’L Birichin» l’ha avù l’umanitaria e filantròpica idea d’invité a disné al ristorant Olimpo diverse ilustrassion dl’arte dialetal piemontèisa, tuti ij sò redator e ij rapresentant dij diversi periòdich sitadin. J’ero na tranten-a… Luis Pietracqua, ël glorios creator dël teatro piemontèis a ocupava ‘l pòst d’onor. I fass a meno da scrive tut lòn ch’i l’oma spicassà e im limito a ricordé, bërlicandme ij barbis, na certa fondùa con trifole, delissiosa, divin-a! E ij tajarin con le quaje? ‘L salmon dël Reno? Ij fasan? Basta, pensoma a d’àutr. Oltre ‘l cavajer Pietracqua i nòto tra ij comensaj: Alberto Viriglio, ‘l cavajer Brero, l’intrepid viagiator african Franzoi, Berta dla «Gasëtta dël Pòpol», Rossi dla «Crònaca dei Tribunali», Oreste Fasolo, l’ator Marchisio, Rico, Eula, president dla «Associassion universitaria», Cirillo Valmagia, Giuliberti, Gigi ‘l bërsalié, vnù apòsta da Pegli, Tito Livido, Amilcare Solferini, Arrigo Frusta, San Orso, Didin, Paggio Bruno e, tanti d’àutri. Al champagne papà Pietracqua l’ha pijà la paròla: a sperava ‘d podèj dì queicòsa tranquilament a la bon-a; l’ha fàit ij cont sensa Franzoi, ël qual con ëd surtìe, ch’a provocavo l’ilarità general, a lo interompìa ògni moment. Però l’orator a l’ha tirà drit e finì sò discors an mes a j’eviva ëd coj che dal prim a l’ùltim ambisso l’onor ëd ciamesse sò alievi. Dòp a l’han vorsù parlé e a l’han parlà as peul disse tuti… Antant quatòrdes poeta (Nossgnor, giutme ti!), l’han decidù ‘d perpetré un sonèt an società: un vers a pr’un, sensa lese coj dj’àutri. E an sinch minute a l’é s-cioduje sta maravija:
L’é ben difìcil che trovandse an festa / an mes a tanta gent si radunà,
che an ciaciarand as perda nen la testa / e as perda fin la stra për torné a ca.
Ma sicome ‘l dover che a tuti an resta / l’é dë scrive un sonèt pi ò meno armnà [1],
così për dì na còsa manifesta / diroma che ‘l sonèt a l’é strassà.
E për furnì [2] con l’anima contenta, / contentomse dla rima e gnente ‘d pì.
E quindi a bèive domje pura andrenta.
Peui… sicome la còsa a dev furnì / al Birichin foma na lòde ardenta.
E tuti ansema alé: Prest a durmì!
Quatòrdes man, quatòrdes servej… ma tant grignolin, tant dossèt, tant bareul e che ‘d champagne!
N’autr disné famos a l’é stàit col dël 1898, l’ann dl’esposission (sota ‘l duumvirato ‘d San Orso e ‘d Paggio Bruno). Stavòlta l’invit a l’era ‘d pì a la bon-a e an piemontèis:
«Giòbia, 6 d’Agost, ‘l Birichin a riuniss a tàula a la tratorìa dël mulèt ij campion dla poesìa piemontèisa. A l’é nòst disné tradissional, che për nen ofende la moralità l’é stàit tramudà al 6 [3]. La quòta as paga a l’intrada an manoscrit da publiché sul giornal… »
Ma ‘l menù, combin ch’a fussa passaje quatr ani, a l’era sempre da Tempi Beati. Giudichene: «Antipasto assortito – Zuppa alla Reine Caroselle – Salmone del Reno con Salsa Serpentaria – Filetto di bue alla Chartreuse – Costolette di Faraona alla Tosolana – Pomodori all’inglese – Pernici allo spiedo e insalata verde – Plombière russe al Champagne – Dessert – Caffè – Liquori – Grignolino – Neblolo – Champagne ».
Ël dì dòp ël «Fischietto» a scrivìa: « Ieri sera gran banchetto del « Birichin », offerto agli amici collaboratori e della stampa cittadina. Gli invitati dovevano pagare la quota con un manoscritto da pubblicarsi sul giornale… Il nostro Caronte portò due righe di legno vero garantito e Caramba una cambiale, pagabile la sman-a dij tre Giòbia, in caricature di là da venire. Il banchetto riuscì cordialissimo e improntato a quella schiettezza piemontese che nei colleghi del giornale in vernacolo è proverbiale… »
Adess i l’avrìa ‘ncora da conteve la stòria galupa dj’àutri disné en petit comité dla Diression ëd lusso con comodo di cucina etc., dël sofà Luis XV, dël botalin ëd Ramsete e dël cofnèt ëd Maria Stuarda. Ma am dijo ch’i l’hai già sëcà bin le miole [4] con le mie stòrie dla rava e dla crava e ch’a sarìa mej ch’i la piantèissa ‘d bacajé [5].
E mi ross come un biro [6], i basso la crësta e i buto berta [7] an sach.
E così finisce la storia de «’L Birichin».
[1] Armné: maneggiare senza cura
[2] Furnì: Finire, terminare
[3] Quella del 2 agosto è una festa nata per goliardia quando alcuni giovani si riunirono per festeggiare la loro virilità. La data scelta, il 2 agosto, non era un caso, ma una questione di assonanza. Ai tempi di Napoleone, si utilizzava l’espressione ‘deux à gauche’ (due a sinistra) per indicare la posizione degli attributi maschili dei soldati stretti nelle calzamaglie. La frase sarebbe stata ripresa in dialetto e alterata in ‘doi d’agost’
[4] Sëché le miole: Scocciare
[5] Bacajé: Chiacchierare rumorosamente
[6] Biro:Tacchino; Ross come un biro: paonazzo
[7] Buté berta an sach: Tacere
